Naugdaw ang Kaulayanan Elementary School nga nahimutang sa Sitio Kaulayanan, Barangay Lirongan Lungsod sa Talakag, pasado alas 3:20 sa kadlawon niadtong Enero 4, 2026, ug dali rang gilamoy sa kalayo, sumala sa usa ka Facebook post sa netizen nga si Manoy Dave.
Sa eksklusibong pakighinabi sa Juander Radyo Malaybalay, gisaysay ni FO1 Jay Ford Magalso sa Bureau of Fire Protection (BFP) Talakag nga padayon pa ang imbestigasyon aron mahibal-an ang hinungdan sa sunog. Matod niya, na-report ang insidente pasado alas 6:00 sa buntag, hinungdan nga didto pa lang sila nakaresponde.
Giingon usab niya nga lisod ang pag-abot sa lugar tungod sa kadaot sa dalan, nga halos dili na maagian bisan sa motorsiklo, ug dili makasaka ang fire truck. Nakaabot sila sa tabang sa Local Government Unit (LGU) nga naghatag og sakyanan aron masulod ang lugar.
Sumala pa kang FO1 Magalso, tulo ka classroom, usa ka principal’s office, ug usa ka makeshift library ang nadamyos sa sunog. Usa sa mga hinungdan sa dali nga mikaylap ang kalayo sa building mao nga half-concrete kini ug halos light materials ang gigamit. Gibanabana ang kantidad sa damyos nga ₱266,250.00.
Sa karon, nagpahimangno ang BFP Talakag sa publiko sa magmatngon sa paggamit sa mga butang nga mahimong hinungdan sa sunog ug tangtangon ang mga nakasaksak sa outlet sa dili pa mobiya sa balay aron malikayan ang overheating nga hinungdan sa sunog.
via: Manoy Dave
