Gidala sa balay-tambalanan ang usa ka 17-anyos nga batang lalaki human naigo sa kilat samtang nagsakay ug kabayo niadtong Enero 2, pasado alas 3:20 sa hapon sa Purok 17, Barangay Hindangon.
Sa eksklusibong pakighinabi sa Juander Radyo Malaybalay, gisaysay ni Indang Kordero, lumulopyo sa maong lugar, nga siya maoy unang nakaresponde sa insidente. Matod niya, sa iyang pag-abot, nakahigda na ang biktima sa yuta, nagdugo ang baba, ug halos dili na makasulti. Dayon niyang gitawag ang rescue aron madala sa ospital ang biktima. Samtang ang kabayo nga gisakyan sa biktima patay sa maong insedente.
Sa laing pakighinabi sa Juander Radyo Malaybalay, si Jonathan Cahanap, Weather Specialist Technical II sa PAGASA Malaybalay, nagpasidaan nga wala pa silay opisyal nga report bahin sa insidente. Apan posible, matod niya, nga ang panghitabo may kalabutan sa grabeng pagdag-om ug pagulan sa Bukidnon niadtong orasa, nga hinungdan sa kilat. Gidugang niya nga ang kilat mahimong muabot og 300 million volts, nga makahatag peligro sa tawo o makapahinabo og sunog.
Sa karon, anaa na sa luwas nga kahimtang ang biktima ug nagpadayon sa pag-ayo sa balay-tambalanan. Subay niini, nagpahimangno ang PAGASA sa katawhan sa pag-amping panahon sa ulan ug kilat, likayan ang pagpahimutang sa open areas ug pagduol sa kahoy, hayop, o metal nga butang panahon sa daot nga panahon.
via: Charlene Poblete
