Gikatakdang pasakahan og kasong pagsupak sa Republic Act 7610 kon the Special Protection of Children Against Abuse, Exploitation and Discrimination Act ang usa ka 59-anyos nga Ginang human gikatahong nag-kidnap og usa ka 7 ka bulan nga batang lalaki atol sa bisperas sa kapaskohan.
Giila ni Police Lieutenant Colonel Atty Mariano Lumbar, Chief of Police sa Surigao City Component Police Station ang suspek nga si Anita Amarille Namog, 59-anyos, residente sa Barangay Cawilan, Taganaan, Surigao del Norte.
Sa impormasyon nga gipaambit sa kapulisan , nagpakitabang pa ang usa ka inahan nga residente sa Barangay Canlanipa ning dakbayan gumikan sa pagkawala sa iyang anak human na-missing samtang nag-shopping sa usa ka iladong mall nga nahimutang sa Barangay Luna sa maong syudad.
Gihanyagan matod pa sa suspek ang inahan sa bata aron pampalit og dulaan ug nagpaila nga usa ka vlogger.
Gikumbinsir pa sa suspek ang maong inahan nga mag-shopping og sanina sa Gaisano Mall, ug gipakaon pa og paniudto sa wala pa mamalit.
Samtang nabusy matod pa ang biktima (inahan sa bata) sa pagpamili og sanina, didto niya nabantayan nga nawala na ang bata lakip na ang suspek nga maoy nagkugos niini.
Sa pagdawat sa otoridad sa maong report, dali silang naglusad og manhunt operation nga miresulta sa pagka-locate sa suspek bandang alas 1:20 sa hapon didto sa Global Port Terminal sa Barangay Taft, nga nagdala pa sa 7-ka bulan nga batang lalaki.
Gilayong naaresto ang suspek nga si Anita Namog ug luwas nga nabawi ang bata. Kasamtangan karung gi-kostudiya sa istasyonan sa kapulisan ang suspek.
