Nasikop sa kapulisan sa Santo Tomas ang duha ka lalake nga gituohang nalambigit sa ilegal nga sugal nga gitawag og “Cara Y Cruz o Hantak” atol sa malampusong anti-illegal gambling operation niadtong alas 2:48 sa hapon, Disyembre 25, 2025, sa Purok 5, Upper San Roque, Barangay Balagunan, Santo Tomas, Davao del Norte.
Gipahigayon ang maong operasyon sa panagtambayayong sa Santo Tomas Municipal Police Station, 2nd Davao Norte Provincial Mobile Force Company, ug RID/PIT Davao Norte, nga miresulta sa pagkadakop sa duha ka suspetsado nga giila pinaagi ni PMAJ Eduardo J. Corpuz, OIC sa Santo Tomas MPS, nga sila Alyas “Pogi,” 46-anyos, minyo ug mag-uuma, ug Alyas “Tisoy,” 44-anyos, adunay ka live-in ug security guard, nga parehong residente sa maong lugar.
Nakumpiska gikan sa ilang posesyon ang duha ka piraso nga one-peso coin nga gigamit isip antugon, usa ka improvised nga bato, kantidad sa bet money, ug usa ka puting plastic container nga adunay marka nga Johnson’s Baby Powder.
Gipadayon na karon ang hustong proseso batok sa duha ka suspek nga anaa sa kostudiya sa kapulisan uban ang nakumpiskang ebidensiya alang sa pagpasaka og kaso sa paglapas sa Presidential Decree no. 1602.
Giawhag sa Santo Tomas MPS ang publiko nga suportahan ang mga kampanya batok sa ilegal nga sugal alang sa kalinaw ug kahusay sa komunidad.
Photo courtesy to: PNP DavNor Stmps
