KAPIN TUNGA SA MILYON NGA SHABU NASAKMIT SA OTCD SA TAGUM CITY

Nasakmit sa mga operatiba sa Organized and Trans National- Crimes Division (OTCD) uban sa koordinasyon sa National Bureau of Investigation – Tagum District Office ang usa ka giilang High Value Individual nga tigpayuhot og ilegal nga droga, bandang, alas-7:30 karong gabie, Disyembre 20, 2025 sa Prk.A, Suaybaguio, Brgy. Magugpo North Tagum City.

Giila ang suspek nga si alyas James, 33-anyos, single, temporaryong nag-abang sa Brgy. North ug residente sa lungsod sa Pantukan Davao de Oro.

Napalitan kini og usa ka daku nga pakete sa gituohang shabu gamit ang buy-bust money pinaagi sa usa ka under cover agent.

Narekober usab gikan sa iyang posisyon ang lain pang napulo (10) ka mga medium size nga pakete nga adunay sulod sa gituohang shabu ug ang nagkadaiyang drug paraphernalia sulod mismo sa giabangan niining kwarto.

Gibana-banang motimbang og 75 gramos ang mga nakumpiska gikan sa maong suspek nga nagkantidad og Php510,000 subay sa Standard Drug Price.

Sa pagkakaron, gibalhog na sa kustodiya sa National Bureau of investigation Tagum ang maong suspetsado alang sa tukmang disposasyon.