Gisaulog sa Public Safety Basic Recruit Course (PSBRC) Class 2002 “Conqueror,” Davao de Oro Chapter, ang ilang ika-23 ka tuig nga anibersaryo pinaagi sa usa ka community outreach program sa Tagaytay Elementary School, Barangay Mipangi, Mawab, Davao de Oro niadtong nakalabay nga adlaw.
Pinangunahan sa mga opisyal sa PNP, sila PLTCOL Eulogia D. Galicia, Chief sa PARMU, ug PCPT Jusibelle P. Abellon, R-PSB Focal Person, ang kalihokan uban sa Revitalized Pulis sa Barangay (R-PSB) Cluster 6–Nabunturan ug lokal nga mga lider.
Sa maong kalihokan, gi-awhag ni PCPT Jusibelle P. Abellon ang mga kabataan nga magpadayon sa pagtuon aron makab-ot ang ilang mga pangandoy, ilabina kadtong nagplano nga mahimong pulis.
Apil sa outreach ang turnover sa duha ka comfort rooms sa Sitio Tagaytay aron masulbad ang problema sa sanitasyon. Gipang-apod-apod usab ang pagkaon, school supplies, tsinelas, hygiene kits, fruit-bearing trees, ug pre-loved nga sinina sa mga residente.
Nakadawat usab ang mga estudyante og packed meals gikan mga inila nga food chain gihatud pinaagi ni Mayor Cyrex L. Basalo.
Gihatagan usab og kagamitan ang mga barangay tanod, sama sa handcuffs, pito, ug flashlights, aron masuportahan ang peace and order sa komunidad.
Gihimo ang outreach program sa usa ka liblib nga lugar isip paghatag balik-serbisyo human sa 23 ka tuig nga pag-alagad sa mga kapulisan alang sa pampublikong kaluwasan.
