Gitambungan sa mga BSPOs gikan sa nagkadaiyang lungsod ug siyudad sa probinsya, kauban ang mga opisyal sa lokal nga pangagamhanan ug mga partner agencies ang Provincial BSPO Congress kagahapon Disyembre 16, 2025 sa Kaamulan Open Theater, Malaybalay City.
Gipanguluhan sa Provincial Population Development Office ang kalihukan ubos sa tema “BSPO at the Frontline: Strengthening Communities through Health, Advocacy, and Responsible Parenthood,” nga nagtumong sa pagpalig-on sa papel sa Barangay Service Point Officers (BSPOs) isip maoy kaabag sa pagpalambo sa kahimsog sa pamilya, adbokasiya, ug responsableng pagkaginikanan.
Sa iyang mensahe, gipadayag ni Neil Aldrin G. Omega, Regional Director sa Commission on Population and Development (CPD) Region X, ang iyang pagdayeg sa mga paningkamot sa mga LGU sa Bukidnon kung asa nakadawat ug award tungod sa ilang malampusong pagpatuman sa “katropa activities” alang sa kalalakihan, nga nagpalig-on sa partisipasyon sa mga amahan ug bana sa family planning ug responsible parenthood ingon man adunay mga LGU nga na-recognize isip epektibo ug nagpatuman sa “demand generation activity,”. Pagtabang sa mga magtiayon makabaton ug duha lamang ka anak.
Dugang pa niya, aduna usab mga LGU nga giila tungod sa epektibong registry sa mga lumulupyo sa barangay ug mga migrante nga dako kaayo ang kamahinungdanon tungod kay mao kini ang sistemang nagtugot sa gobyerno sa paghimo og komprehensibong pag-analisa sa kasamtangang kahimtang sa mga residente.
Ang Provincial BSPO Congress nahimong plataporma alang sa pagpaambit sa kasinatian, best practices, ug kalampusan sa mga BSPOs, nga nagpabilin isip mga frontliner sa pagpalambo sa kahimsog sa pamilya ug kalamboan sa komunidad.
