Padayon naka-heightened alert ang Bukidnon Provincial Police Office (PPO) aron masiguro ang proteksyon sa katawhan samtang nagasaulog ang probinsya sa umaabot nga Pasko ug Bag-ong Tuig 2026.
Sumala ni PPO Spokesperson Captain Shella Joy Jangad sa pakighinabi sa Juander Radyo Malaybalay, nakadeploy na ang mga personahe sa PNP sa matag entry points sa lalawigan, labina sa mga national highways ug nagkadaiyang lugar nga adunay pagdagsa sa tawo aron masiguro ang kalinaw ug seguridad sa publiko.
Sa pikas bahin, gi-andam usab sa Valencia City Disaster Risk Reduction and Management Office (CDRRMO) ang mga sumbanan alang sa luwas nga pagselebrar sa Pasko ug Bag-ong Tuig.
Gitataw ni CDRRMO Chief Jun Valero, ang Incident Management Team nga ang ahensya naka-alerto sa tanang oras, ilabi na sa panahon sa Simbang Gabi ug mga night markets.
Matod pa niya, 24 oras nga naka-alerto ang opisina tungod kay sila ang frontliners sa tanang emerhensiya ug walay holiday.
Hugot karon ang panawagan sa CDRRMO ug kapulisan nga likayan ang pagpamalit ug paggamit sa mga pabuto aron malikayan ang disgrasya ug problema sa kasiyahan sa panahon sa kapaskohan.
via: BUKPPO/CDRRMO VALENCIA
