Gikabutyag ni konsehal Eric Salcedo, kinsa kasamtangan nga overseer sa Roads and Traffic Administration (RTA) nga wala nay kasulbaran ang problema sa trapiko sa syudad.
Pagpasabot sa konsehal nga nagkadaghan ang ihap sa mga sakyanan apan nagpabilin nga gamay ang dalan, busa expected ang huot nga dagan sa trapiko labi na sa mga peak hours ug karon ang holiday rush.
Apan taliwala sa kadako ug kaseryoso niini nga problema, gipasalig gihapon sa Konsehal nga padayon ang ilahang pagpangita og pamaagi aron man lang maminusan ang kabug-at sa dagan sa trapiko.
Lakip gihisgutan ni Salcedo ang pagpakunhod sa travel time, pagdugang sa visibility sa mga personahe sa RTA sa kadalanan partikular na ngadto sa pinaka-busy nga mga kadalanan sa syudad.
Hingusgan sab nila ang pagsolbad sa illegal parking ug illegal nga mga structures sa kadalanan nga usa sa rason nga nagpahuot sa mga gagmayng kadalanan.
Samtang aduna na sab kontraktor nga motan-aw sa mga traffic lights nga wala naga-functions aron masuta kung kaya pa kining ma-repair o nagkinahanglan na nga ilisan.
Photo courtesy: City Councilor Eric Salcedo/ Facebook
