Gilauman na sa Philippine Ports Authority (PPA) ang pagdagsa sa mas daghang pasahero sa mga pantalan sa nasud karong holiday season.
Sa gipahigayon nga Kapihan sa Pantalan, gisulti ni PPA General Manager Jay Santiago nga posibleng moabot sa 4.6 milyon ang ihap sa mga pasahero sugod karong adlawa hangtod sa Enero 5, 2025.
Tungod sa gipaabot nga dagsa sa mga pasahero, iyang gimanduan na ang mga kawani sa mga pantalan nga siguruhon nga magpabilin nga husto ang pasilidad ug mahimong komportable ang sitwasyon sa mga byahero.
Gawas pa niini, mas hugot nga seguridad ang gipahimutang sa mga pantalan diin gipahimutang na sa heightened alert status sugod karong adlawa ang PPA, isip pagpangandam sa gipaabot nga pag-abot sa mga pasahero nga mamauli sa ilang tagsa-tagsa ka probinsya.
Gipadali na usab sa PPA ang pag-ayo sa pipila ka mga pasilidad sa mga pantalan nga naguba sa milabay nga bagyo.
Kalabot niini, tutukan sa PPA ang mga pantalan sa Iloilo, Batangas, Mindoro, Davao, ug Manila. Sumala sa datos sa PPA, gikan sa Enero hangtod Oktubre 2025, miabot sa kapin 69.1 milyones nga pasahero ang natala, nga mas taas og 5.25 percent kumpara sa miaging tuig.
Photo courtesy: Philippine News Agency
