Gibutyag sa Department of Foreign Affairs nga wala pa silay nadawat nga impormasyon gikan sa Philippine Embassy sa Portugal bahin kang kanhi kongresista Zaldy Co.
Sumala kang DFA spokesperson Angelica Escalona, wala pay opisyal nga report gikan sa embahada. Niadtong miaging semana, gipahibalo ni Presidente Ferdinand Marcos Jr. nga gikansela na ang Philippine passport ni Co, nga mibiya sa Pilipinas tungod sa medikal nga hinungdan.
Nagpadayon ang imbestigasyon batok kang Co may kalabotan sa budget insertions ug flood control projects. Gipasabot sa DFA nga ang kanselasyon sa pasaporte ipahibalo sa Bureau of Immigration, Philippine Center on Transnational Crime, ug Interpol alang sa international alert system.
Wala usab matubag sa DFA kung adunay foreign passport si Co, kay dili tanang Pilipino nga adunay laing citizenship nag-report sa ahensya. Samtang, miingon ang DILG nga nag-coordinate na kini sa Portugal, ug nangayo na ang NBI sa Interpol og red notice.
Una nang gideklarar sa Sandiganbayan si Co nga fugitive from justice. Siya ug 16 ka uban pa giatubang og kaso sa malversation ug graft may kalabotan sa Php289-milyon nga substandard road dike project sa Oriental Mindoro.
Photo Courtesy to: Journal News Online
