Hoyhoy ang abaga sa duha ka indibidwal nga gidakop sa mga personahe sa Capoocan Municipal Police Station (MPS) tungod sa ilang giingong pag-apil sa ilegal nga pagpatigayon og tupada sa Barangay Balucanad, Capoocan, Leyte niadtong Nobyembre 4, 2026. Gipangulohan ang operasyon ni PMAJ Joselito C. Mislos, Acting Chief of Police.
Giila ang mga nadakpang suspek sa ilang mga alyas nga “Atoy” ug “Kael,” nga pulos residente sa maong barangay. Gipahibalo sila sa hinungdan sa ilang pagdakop ug sa ilang mga katungod ubos sa Konstitusyon, gamit ang pinulongang ilang nasabtan, sa wala pa gidala sa Capoocan MPS alang sa dokumentasyon ug hustong disposisyon.
Nag-andam na ang kapulisan sa pagpasaka og kaso batok sa duha ka suspek tungod sa paglapas sa Presidential Decree No. 449 o Cockfighting Law of 1974. Nagpahinumdom kini nga ang ilegal nga tupada adunay katugbang nga silot ubos sa balaod, busa gikinahanglan ang pagsunod sa mga regulasyon aron mapadayon ang kalinaw ug kahusay sa komunidad.
Photo courtesy: Capoocan Municipal Police Station
