Nagpagawas ang Global Advisory Committee on Vaccine Safety (GACVS) sa World Health Organization (WHO) og bag-ong pagtuki nga nag-ingon nga walay ebidensiya sa koneksyon tali sa bakuna ug autism spectrum disorders (ASD).
Base sa 31 ka pagtuon gikan sa 2010 hangtod 2025, gipalig-on sa komite nga luwas ang mga bakuna nga gigamit sa pagkabata ug pagmabdos.
Gisusi usab ang mga bakuna nga adunay thiomersal ug aluminum adjuvants, ug napamatud-an nga wala kini koneksyon sa ASD.
Apil sa ebidensiya ang kaylap nga datos gikan sa Denmark nga naglangkob sa mga bata nga natawo gikan sa 1997 hangtod 2018.
Gisubli sa GACVS ang naunang konklusyon niadtong 2002, 2004, ug 2012 nga ang bakuna dili hinungdan sa autism.
Giawhag sa WHO ang mga nasud nga ibase ang ilang mga polisiya sa pinakabag-o nga siyensya aron mapadayon ang kalampusan sa pagbakuna nga nakaluwas sa gibanabana nga 154 milyon nga kinabuhi sa miaging 50 ka tuig.
Photo courtesy: World Health Organization
