Gipalapdan sa National Bureau of Investigation (NBI), ang ilang imbestigasyon sa mas daghang lugar.
Matod ni NBI Acting Director Atty. Angelito Magno, nga ang sakop sa imbestigasyon naglakip sa mga peke, substandard, ug bisan mga proyekto nga wala matukod bisan pa sa gipagawas nga pundo.
Gipasabot ni Magno, nga una nang gitutokan sa ahensya ang mga proyekto sa Bulacan apan gipunting usab karon ang ubang mga lugar nga adunay namatikdan nga mga anomaliya nga proyekto.
Bisan pa nga wala gitino sa opisyal ang mga lugar, iyang gipasalig nga ang mga lokal nga opisina niini nagkolekta sa tanan nga masubay nga ebidensya.
Dugang pa ni Magno, kaugalingong inisyatiba kini sa NBI, ug walay mando gikan sa Department of Justice, ang inahan nga ahensya sa investigating body. Apan matod niya nga nagpabiling abli ang NBI sa pag-kooperar sa ahensya, samtang nagpadayon ang imbestigasyon niini.
Gipasalig usab sa kadagkoan sa NBI, ang mas lawom nga pagtuki sa tanang mga anomalosong proyekto nga natumbok, ug ang paggukod sa mga responsable niini.
Kahinumduman, sa wala pa si Atty. Magno milingkod sa katungdanan, gimanduan na ni kanhi NBI Director Jaime Santiago ang mga rehiyonal nga buhatan sa ahensya sa paghipos og impormasyon sa mga gikatahong flood control scandals sa ilang tagsa-tagsa ka areas of responsibility.
Photo Courtesy to: NBI
