Gi-anunsyo ni Bangko Sentral ng Pilipinas (BSP) Governor Eli Remolona Jr. nga posibleng mo-ubos ang Gross Domestic Product (GDP) growth sa Pilipinas ngadto sa 3.8% sa ika-upat nga quarter sa 2025, gikan sa 4.0% sa ikatulong quarter ug usa ka dako nga pagkunhod kumpara sa 5.3% niadtong 2024.
Matod ni Remolona, ang maong pagkunhod sa GDP resulta sa padayon nga epekto sa kontrobersiya bahin sa flood control corruption, nga nakaapekto sa kalig-on sa ekonomiya sa nasud.
Gibutyag niini nga ang paghinay sa GDP adunay kalabotan sa ubos nga public construction investments, nga miabot og 26.2% sa ikatulong quarter.
Dugang usab sa BSP ang mga rate cut nga gipahigayon sukad Agosto 2024 aron mapalambo ang demand sa merkado, apan wala pa matapos ang easing cycle sa BSP.
Gipamahayag ni Remolona nga posible pa gihapon ang dugang nga rate cut sa sunod tuig depende sa kahimtang sa ekonomiya ug sa mga bag-ong datos nga makolekta sa BSP.
Bisan pa niana, gipasabot niya nga ang bisan unsang lakang kinahanglan buhaton nga hinay-hinay aron malikayan ang dugang nga pagduha-duha sa mga mamuhunan.
Photo Courtesy to: PDRF
