Nagkadoul na ang katumanan nga makabaton na gayud ug kaugalingong government hospital ang syudad sa Valencia nga pagatawagon ug Valencia City Good Samaritan General Hospital.
Kini human giaprobahan na sa Department of Health (DOH) ang Permit to Construct para sa maong pasilidad. Nagpasabot nga pwede na magsugod ang construction sa hospital sumala sa nalatid nga structural plan niini.
Kahinumduman nga aduna nay daang nagbarog nga building sa maong lokasyon hinungdan nga gamay nalang ang gikinihanglan nga idugang aron mahimo na kining hingpit nga hospital sumala sa direktiba sa DOH.
Nahimutang sa New Terminal Complex, Sayre Highway, Poblacion,Valencia City, ang maong pasilidad adunay kinitibuk-ang bed capacity nga 116 beds ug mag operate ubos sa level 1 nga kategorya.
Dakong tabang kini sa mga lomolupyo sa Valencia City hilabina sa mga indigent nga mga pasyente nga walay ikasarang magpaadmit sa mga pribadong hospital tungod sa kawad-on.
Kining dakong proyekto nakabaton ug katumanan ubos sa pagpanguna ni Mayor Amie G. Galario, former City Mayor ug kasamtangang consultant Jun Galario, Hon. Vice Mayor Griezl Galario-Fernandez ug tibuok myembro sa 10th SP, mga medical professionals, ug tanang mga stakeholders.
Photo Courtesy to: City Government of Valencia
