Nikunhod ang ekonomiya sa Pilipinas gikan sa 5.7% niadtong 2024 ngadto sa 5.1% karong 2025, base sa pinakabag-ong Economic Update sa World Bank.
Usa sa gihisgutan nga rason mao ang negatibong epekto sa “flood control scandal” ug giingong dagkong anomaloso ug korapsyon sa mga proyekto sa nasud.
Sumala sa news release sa World Bank, kinahanglan nga daling atubangon sa gobyerno ang mga iregularidad sa flood control projects aron malikayan ang dugang pag-ubos sa ekonomiya.
Gipakita sa report nga ang kakulang sa hapsay ug epektibong imprastraktura sa baha maoy hinungdan sa paglangan sa mga proyekto, pagkalugi sa negosyo, ug kahuyang sa kumpiyansa sa mga mamuhunan. Gipadayag usab sa World Bank ang pagkunhod sa foreign direct investments (FDI) ug gasto sa gobyerno alang sa public infrastructure.
Gibutyag usab sa report nga dakong epekto ang mga bagyo ug dagkong pagbaha nga nakapahinay sa operasyon sa mga negosyo ug daghang proyekto.
Gipunting pa sa World Bank ang kabalaka sa pagkunhod sa ihap sa mga turista gikan sa South Korea, nga usa sa pinakadagkong tinubdan sa turismo sa nasod. Bisan pa niini, gipakita sa World Bank nga oportunidad ang pagsulbad sa flood control scandal aron mas mapauswag ang mga proyekto batok baha ug aron matabunan ang mas lapad nga problema sa korapsyon ug hinay nga pagpatuman sa imprastraktura.
Misuporta ang punong ekonomista sa Rizal Commercial Banking Corporation (RCBC) nga si Michael Ricafort sa analis sa World Bank. Sumala kaniya, dako usab ang epekto sa ekonomiya sa pagpahawa o pagdili sa operasyon sa mga POGO sa pagtapos sa 2024, nga hinungdan sa kakulangon sa daghang oportunidad sa negosyo.
Sa laing bahin, sumala sa World Bank, makatabang sa pagbangon sa ekonomiya ang “strong investments” ug mga reporma.
Photo Courtesy to: Center for Earth Ethics
