Gikondena sa mga Arab Nations, lakip na ang Egypt, Qatar, ug unom pa ka mga Muslim-majority nga mga nasud, ang plano sa Israel nga one-way nga pag-abli sa Rafah border crossing.
Sa gikaingong plano, tugutan lamang ang mga Palestino nga mobiya sa teritoryo, apan dili sila pasudlon pag-usab, ug ipugos usab ang pagdili sa humanitarian aid nga mosulod.
Matod sa mga nasud, kini nga lakang usa ka seryosong paglapas sa ceasefire nga gikasabutan sa Hamas ug Israel sulod sa pito ka semana.
Mihatag og pahayag ang mga foreign ministers sa Egypt, Indonesia, Jordan, Pakistan, Qatar, Saudi Arabia, Turkey, ug United Arab Emirates nga nagsabot sila nga ang plano sa Israel usa ka klaro nga paglapas sa gikasabutang kalinaw.
Gihisgutan usab sa mga nasud nga sukad nga gisugdan ang ceasefire, kapin sa 600 na ka mga paglapas ang gihimo sa Israel, nga nagpadayon sa pagkagubot ug mga tensyon sa rehiyon.
Padayon ang mga nasud sa pagpangayo sa Israel nga respetuhon ang kasabutan ug tugotan ang libre ug walay babag nga pagpadala sa humanitarian aid ngadto sa Gaza, aron matabangan ang mga Palestinong apektado sa krisis.
Photo Courtesy to:Reddit
