Gihatagan ug ultimatum nga kutob lamang sa Disyembre 22 ning tuiga ang paghulat sa Malaybalay City Government sa tubag sa Prime Water sa mga gisang-at nga reklamo ug mando nga pahawaon ang kompanya tungod sa dili maayong serbisyo sa patubig sa tibuok dakbayan.
Mao kini ang gibutyag ni Malaybalay City Water District (MCWD) General Manager Engr. Nolito Binahon sa usa ka eksklusibong pakighinabi sa Juander Radyo Malaybalay. Sumala pa sa opisyal, padayon ug wala nay makapugong sa plano sa syudad nga papahawa-on ang Prime Water diin namatikdan nga wala na-meet niini ang mga nalatid sa gikasabotan nga kontrata.
Apan giingon ni Binahon nga kinahanglan taliwala sa ilang paningkamot nga mabalik ang pagdumala sa operasyon sa patubig syudad kinahanglan pang sundon ang legal nga mga pamaagi, tungod kay legal man ang joint venture sa Prime Water tali sa Malaybalay City Water System.
Nasayrang human sa gitakda nga deadline, magpadayon ang proseso sa pagpanagbulag sa Prime Water ug MCWD, ug gilaoman ang Malaybalay City Water System na maoy mo-operate sa serbisyo sa patubig sa tibuok syudad, pinaagi sa suporta sa Water System Project ni Senator Juan Miguel “Migz” Zubiri, gamit ang lahi nga mga linya sa tubig para sa mas episyenteng serbisyo.
Mahinumdumang sukad gidumala sa Prime Water ang distribution sa patubig syudad daghan mga konsumante ang nagreklamo sa dili bastante ang pag-supply niini.
via: LGU Malaybalay
