Giisyuhan sa Letter of Inquiry ang pito ka grocery stores sa syudad sa Valencia human nakit-an sa Department of Trade and Industry (DTI)–Bukidnon ang ilang kapakyasan sa pagsunod sa gipatuman nga price freeze may kalabutan sa State of Calamity nga gideklarar atol sa pagbaha sa syudad niadtong Setyembre 17, 2025, ug sa National State of Calamity sa tibuok nasud.
Sumala ni Junar Merla, Consumer Protection Division Chief sa DTI Bukidnon sa pakighinabi sa Juander Radyo Malaybalay nga base sa ilang monitoring, adunay mga tindahan nga misaka ang presyo sa pipila ka batakang palaliton nga dapat nagpabiling stable ilawom sa price freeze order.
Tungod niini, gitagaan ang maong mga tindahan og 48 ka oras aron motubag ug maghatag og klarong rason ngano nga misaka ang presyo sa ilang mga baligya. Kon mapamatud-an nga walay igong rason ang pagtaas, posibleng maisyuhan sila og Notice of Violation.
Posible usab makamulta gikan ₱5,000 hangtod ₱1,000,000, depende sa nahimong kalapasan.
Sa karon, padayon ang DTI sa pag-monitor aron masiguro nga walay establishamento nga mokompromiso sa kahimtang sa konsumidor, labina sa panahon sa kalamidad samtang gidasig ang publiko nga mosumbong dayon kon adunay makita nga dili patas nga pagtaas sa presyo sa mga palaliton.
via:DTI BUKIDNON
