Mas gipakusgan ug gipalig-on pa sa Philippine National Police (PNP) ang pagbantay sa mga presyo sa palaliton sa mga merkado aron malikayan ang hulga sa profiteering ug hoarding karong holiday season.
Sumala ni Acting PNP Chief PLtGen. Jose Melencio Nartartez Jr., kini aron masiguro nga dili maabuso ang katungod sa mga konsyumer ug aron maprotektahan usab ang mga mamalitay taliwala sa padayon nga pagsaka sa presyo sa mga palaliton sama sa karne, gulay, ug uban pa pipila ka semana sa dili pa ang bisperas sa Pasko.
Tungod niini, nagbutang ang PNP og dugang mga pulis sa mga merkado, supermarkets, wet markets, ug uban pang kamerkaduhan aron makaresponde dayon sa mga posibilidad sa pagpahimulos sa mga retailers ug aron malikayan ang hoarding ug panic-buying sa mga konsyumer.
Kini resulta usab sa ilang hugot nga koordinasyon sa Department of Trade and Industry (DTI) ug apil sa mga local government units (LGU’s) aron mapadayon ang hugtanong pagbantay sa lihok sa mga presyo ug sa mga iligal nga kalihokan niining panahona.
Samtang, gisiguro usab sa Nasudnong Kapulisan sa publiko nga nagpadayon ang ilang pagpatuman sa ubang mga lakang ug mga intelligence-driven operations aron mahibaw-an ug madakpan ang mga hoarders ug mga sindikato nga nagsulay pagpamugos sa pagmaniobra sa presyo sa palaliton.
Photo courtesy to : PNP
