Dul-an 18,000 ka mga tigulang nga adunay dementia sa Japan ang na-report nga nibiya sa ilang mga balay ug nawala niadtong miaging tuig, ug halos 500 kanila ang nakaplagang patay.
Sumala sa mga report, kini nga mga insidente midoble sukad kaniadtong 2012, nga nagpakita sa nagkagrabe nga problema sa nasud nga adunay labing daghang tigulang sa tibuok kalibutan.
Ang krisis mas napalalom pa tungod sa pagkunhod sa ihap sa mga mamumuo ug sa hugot nga limitasyon sa pagsulod sa mga langyawanong caregiver.
Sumala sa Health Ministry, gibanabana nga moabot na sa 14 trillion yen kon ($90 billion) ang gasto sa kagamhanan alang sa pag-atiman sa mga tawo nga adunay dementia pag-abot sa 2030, gikan sa 9 trillion yen karong 2025.
Samtang aron matubag ang maong problema, mitutok ang Japan sa pag-develop og mga teknolohiya diin naggamit ang kagamhanan og mga GPS-based tracking systems aron ma-check ang mga tawo nga adunay dementia nga dali mawala.
Nakaplagan nga adunay mga wearable GPS tags nga mopahibalo sa mga awtoridad kung mogawas ang usa ka tawo nga adunay dementia gikan sa luwas nga lugar, ug aduna usay mga convenience store workers nga makadawat og real-time notifications aron mangita sa nawagtang nga tawo.
Ang maong teknolohiya gipalig-on sa Artificial Intelligent kun (AI) aron matino ang mga sayong timailhan sa dementia pinaagi sa pag-analisar sa lihok ug postura.
Kini nagtugot usab sa mga doktor nga maagapan ang kondisyon sa mga tawo nga adunay dementia ug matabangan ang mga pasyente nga magpabilin nga aktibo sa mas dugay nga panahon.
Samtang, ang mga humanoid robots sama sa AIREC nga gihimo sa Waseda University gigamit usab aron motabang sa mga tigulang sa yano nga mga buluhaton sama sa pagsul-ob og medyas ug pagluto.
Gilauman sa mga siyentipiko nga makatabang usab ang mga robot sa pag-ilis og diapers ug pagpugong sa bedsores.
Gawas pa niini, usa ka gamay nga robot nga gitawag og Poketomo ang gidesinyo aron maghatag og emotional support, sama sa pagpahinumdum sa mga tambal ug pag-atiman sa mga tawo nga naka-eksperyensya og social isolation.
Photo courtesy to : THE GUARDIAN
