Moabot sa 50 ka tawo, lakip ang 33 ka bata, ang namatay human gi-atake sa drone ang usa ka kindergarten sa lungsod sa Kalogi, sumala sa Sudan Doctors’ Network ug sa Sudanese military.
Gi-report nga ang paramilitary group nga Rapid Support Forces (RSF) dugay nang nakig-away sa gobyerno, samtang giakusahan sa kagamhanan ang RSF sa mga pag-atake.
Apan, miinsister ang RSF nga ang militar ang nagpaluyo sa drone strikes sa usa ka merkado sa Darfur, nga miigo usab sa usa ka fuel depot sa Adre border sa Chad.
Namatikdan nga sukad niadtong Abril 2023, misamot kainit ang panagbangi tali sa RSF ug mga tropa sa Sudan human sa panag-away sa gahum sa gobyerno, nga misangpot sa padayon nga civil war sa nasod.
Matod sa army-aligned foreign ministry, kaduha giigo sa drone missile ang kindergarten, lakip na ang mga sibilyan ug medical team nga mitubag lamang sa dapit.
Tungod sa insidente, gikondenar sa UNICEF ang nahitabo ug gitawag kini nga “horrific violation of children’s rights,” nanawagan sa tanang partido nga hunongon ang ingon niini nga mga pag-atake ug tugotan ang hinabang nga makaabot sa mga nanginahanglan.
Photo courtesy: BBC News
