Gisugdan na ang pagtukod sa libre nga Dialysis Center sa dakbayan sa Valencia, Bukidnon, isip usa sa mga serbisyo nga itanyag sa bag-ong City Hospital, nga mao ang flagship project sa lokal nga panggamhanan.
Sumala sa update ni City Spokesperson Jun Galario, pila ka semana na ang milabay sukad gisugdan ang konstruksyon sa maong Dialysis Center. Giingon nga kini dako kaayong tabang sa serbisyong medikal sa dakbayan, ilabi na sa mga pasyenteng adunay sakit sa kidney. Libre kini alang sa tanang taga-Valencia, basta membro sa PhilHealth.
Gikatakda usab karong bulan sa Disyembre nga madawat ang gihulat nga Permit to Construct (PTC) gikan sa Department of Health National Office, usa ka lakang aron ma-release sa Landbank of the Philippines ang pasiunang Php 200 milyon nga loan sa syudad. Sumala sa Committee on Health Chairperson, Konsihal Jerusha Sasang Cadigal, ang pondo gamiton sa pag-renovate sa kasamtangang City Health Office ug himuon kini nga City Hospital.
Ang itukod nga public hospital adunay kapasidad nga 50 ka kama, kompleto sa mga pangunahing medical equipment, ilabi na ang mga gamit sa emerhensya, aron masiguro ang kalidad ug kompleto nga serbisyo sa mga pasyente.
Ang proyekto usa ka dako nga lakang sa syudad aron mapaayo ang access sa medikal nga serbisyo ug matubag ang panginahanglan sa mga pasyente sa Valencia City.
via: LGU VALENCIA
