Mipasar na sa Senado sa ikaduhang pagbasa ang gisugyot nga PHP6.793 trilyon nga badyet sa nasud alang sa tuig 2026, human sa halos usa ka adlaw nga interpellation nga gipangulohan ni Senate Minority Leader Alan Peter Cayetano. Ang General Appropriations Bill (GAB) sa katapusan naaprobahan alas 5:50 sa hapon, Huwebes, Disyembre 4.
Sumala sa liderato sa Senado, ang diskusyon hingpit nga gituki sa mga importanteng probisyon sa gisugyot nga pondo—gikan sa mga serbisyong sosyal, imprastraktura, agrikultura, hangtod sa pagpangandam sa katalagman—aron masiguro nga ang matag piso nga gigasto adunay klaro nga direksyon ug makabenepisyo ang katawhan.
Target sa Senado nga mapasar ang badyet sa ikatulo ug katapusang pagbasa sa Disyembre 9, sa dili pa kini isumite sa bicameral conference committee uban sa mga representante sa House sa sunod semana. Sa bicam, ang mga probisyon nga managlahi tali sa duha ka bersyon paga-reconcilehon ug ang mga pondo nga gibalhin o gidugang paga-reviewhon sa dili pa isumite sa Malacañang alang sa katapusang pirma sa Presidente.
Gipunting sa pipila ka mga senador nga ang badyet sa 2026 kinahanglan nga mas naka-pokus sa seguridad sa pagkaon, pagmugna og trabaho, ug kalig-on sa ekonomiya, labi na samtang ang mga presyo sa palaliton nagpadayon sa pagsaka ug ang mga tensyon sa kalibutan nakaapekto sa ekonomiya.
via: BUSINESS WORLD
