Mikunhod og labaw lima ka porsiyento ang lokal nga produksiyon sa abaca base sa pinakabag-ong datos sa industriya, tungod sa dakong kadaot nga gidala sa mga bagyo nga miigo sa mga lugar nga nag-unang produkto ang abacca.
Sumala ni Aurora Peralta, executive director sa Association of Abaca Pulp Manufacturers Inc. (APMI), base kini sa datos sa produksyon kutob Setyembre nga nagrepresentar sa halos 70 porsiyento sa gipaabot nga output karong tuiga. Adunay 5.3 porsiyento ang pagkunhod ikumpara sa produksiyon niadtong 2024.
Gibutyag si Peralta nga mikunhod na og 24.5 porsiyento ang produksiyon kung ikumpara sa 57,000 metric tons nga natala niadtong 2014. Ang pagkunhod karong tuiga matod pa tungod sa dako’ng kadaot nga gibilin sa mga bagyo sa mga rehiyon nga nanguna ang produksiyon sa abaca, ilabina sa Bicol nga usa sa pinakadako’ng produser sa nasod.
Sa usa ka report sa Philippine Fiber Industry Development Authority (PhilFIDA), giingon nga mokabat og kapin Php1.2 bilyon ang kadaot sa industriya sa abaca sa Catanduanes tungod sa Bagyong Uwan, nga nakaapekto sa 13,899 ka mga mag-uuma.
Gisumite na sa PhilFIDA sa Department of Agriculture (DA) ang usa ka rehabilitation plan aron masuportahan ang pagbangon sa sektor, nga posibleng molungtad og hangtod 24 ka bulan.
Gisugyot usab sa Department of Labor and Employment (DOLE) ang paghatag og temporary labor support alang sa mga apektadong mag-uuma, lakip ang Php10,000 nga pinansiyal nga tabang alang sa labing grabe’ng naapektuhan, ug Php7,000 alang sa mga lugar nga adunay moderate damage.
Aron mas mapalig-on ang industriya, giawhag ni Peralta ang gobyerno nga ibalik ang paggamit sa abaca fiber sa Philippine banknotes aron makahatag og lig-on nga demand ug suporta sa lokal nga mga mag-uuma.
Ang Pilipinas nagasuplay og mga 85 porsiyento sa tibuok kalibutanong panginahanglan sa abaca, sumala sa PhilFIDA, hinungdan nga dakong kontribyutor kini sa global fiber market.
Photo Courtesy to: Panublix
