Gikompirmar ni Department of Agriculture Sec. ni Francisco Tiu-Laurel Jr. ang pagpabalik sa maximum suggested retail price o MSRP sa pipila ka pinili nga imported agri products.
Lakip sa mga produkto nga ipailalom sa kinatas-ang suggested retail price mao ang pork products, sibuyas, ug carrots.
Matod sa kalihim, tukma sa panahon ug gikinahanglan ang pagpabalik sa MSRP tungod sa padayong pagsaka sa presyo sa maong mga produkto sa nagkadaiyang merkado sa nasud.
Partikular nga gipasiugda ang kahimtang sa sibuyas, kansang mga presyo niabot sa ₱300 matag kilo sa pipila ka lugar.
Sa implementasyon, ang MSRP itakda sa ₱370 sa liempo, ₱340 sa kasim ug pigue, ug ₱120 sa matag kilo sa imported nga puti ug pula nga sibuyas, apil na ang imported nga carrots.
Target sa Department of Agriculture (DA) ubos sa pagpangulo ni Secretary Tiu-Laurel nga ipagawas ug ipatuman ang bag-ong MSRP sa dili pa ang Disyembre 1, 2025.
Ang nag-unang tumong niini nga lakang mao ang pagpugong sa kalit ug sobra nga pagsaka sa presyo sa mga batakang palaliton karong umaabot nga holiday season.
