Malipayon nga gisaulog sa dakbayan sa Malaybalay ang Children’s Day isip kabahin sa 33rd National Children’s Month Celebration, nga nagdala sa temang “OSAEC-CESAEM WAKASAN, karapatan ng bata ipaglaban.” Ang kalihokan gi-host sa City Council for the Protection of Children (CCPC) uban ang suporta sa City Social Welfare and Development Office (CSWDO) didto sa Kaamulan Folk Arts Theater kagahapon Nobyembre 24, 2025
Matod ni Ivy Amor C. Urbina, ang City Social Welfare and Development Officer sa CSWDO Malaybalay sa pakighinabe sa Juander Radyo Malaybalay nga sa maong programa gisalmutan sa nagkalain-laing elementary schools sa mga distrito sa syudad ang Folk Dance ug Modern Hip Hop Dance Contest nga nagpakita sa makalingaw ug makapahimuot nga presentasyon sa ilang modernong talento ug kusog sa sayaw.
Aron mapasidunggan ang abilidad sa kabataan, gipanghatagan ug cash prizes ang mga mananaog sa unang, ikaduhang, ikatulong pwesto, lakip na ang mga consolation prizes.
Gipangulohan ang selebrasyon ni City Mayor Warren Pabiliaran, uban sa mga miyembro sa 10th Sangguniang Panlungsod ug mga councilors nga nagbarug alang sa kaayohan sa kabataan, lakip na sila Councilor Niko Aldeguer, Councilor Manoy Legaspi, Councilor Dindo Dinlayan, ug SK Federation President Christopher Tortola.
Ang maong kalihokan usa ka dakong lakang aron palig-onon ang katungod sa kabataan, maprotektahan ang ilang kaayohan, ug masiguro nga sila motubo sa malipayon, luwas, ug mahimsog nga palibot.
