Gibasura sa Korte Suprema ang mosyon nila Senador Bato Dela Rosa ug kanhi Presidente Rodrigo Roa Duterte, kalabot sa giingong arrest warrant nga giisyu sa International Criminal Court (ICC).
Atol sa En Banc Session sa Korte Suprema, gibalibaran niini ang hangyo sa mga petitioner sa Very Urgent Motion nga gisang-at niadtong Nobyembre 12.
Nihangyo ang magbabalaod ug kanhi presidente, nga mandoan sa korte si Ombudsman Jesus Crispin ‘Boying’ Remulla nga buhian o ipakita ang kopya sa arrest warrant gikan sa International Criminal Court.
Kahinumduman nga bag-ohay lang gibutyag ni Ombudsman Remulla nga niluwat matod pa og warrant ang ICC ug duna na siyay kopya niini.
Bahin niini, gimando sa Korte Suprema ang Department of Justice, Department of Foreign Affairs ug uban pang mga respondents sa pagsumite sa ilang mga komento sulod sa napulo ka adlaw sa bulag nga ‘Very Urgent Manifestation’ sa mga petitioner.
Apan bisan pa niini, wala gihapon giaksyonan sa Korte Suprema ang kanhi petisyon nila Sen. Bato ug kanhi Pres. Duterte bahin sa kooperasyon sa gobyerno sa ICC.
Photo courtesy to: Diskurso
