Dakpan ang usa ka security guard, human kining nagdala-dala og dili lisensyadong pusil sa gipahigayong checkpoint sa Tulunan Municipal Police Station sa Border Control, Crossing Muslim, Barangay Bual, Tulunan, Cotabato, alas 2:15 sa kahaponon niadtong Nobyembre 18, 2025.
Sa taho, samtang nagapahigayon og checkpoint ang kapulisan usa ka itom nga XRM, adunay plakang MC 84545 nga gimaneho ni alyas Oku, 38-anyos, minyo, ang gipahunong sa otoridad aron sa pagahimoon nga inspeksyon.
Sa hangyo sa mga personahe sa checkpoint, boluntaryong mitugot ang suspek sa pagsusi sa under-seat compartment sa iyang motorsiklo, nga miresulta sa pagkadiskubre sa usa ka armas nga gitago sulod sa ilawom sa kahon. Dihang gihangyo nga ipresentar ang iyang License to Own and Possess Firearm (LTOPF), rehistrasyon sa armas, ug uban pang may kalabotan nga mga dokumento, wala nakapresentar ang suspek.
Narekober gikan sa iyang possession ang usa ka Remington 1911 Cal. .45 pistol, usa ka steel magazine, unom ka buhing bala sa .45 ug mga identification card. Gipahibalo dayon ang suspek sa iyang katungod sa konstitusyon, ayha gidala sa Tulunan MPS.
Sa karon, ginaandam na sa otoridad ang kasong paglapas sa RA 10591 o Comprehensive Firearms and Ammunition Regulation Act batok sa suspetsado.
Photo courtesy to: PRO 12 Tulunan MPS
