Gibutyag ni Konsehal Maximo Rodriguez III nga ang tanang 81 ka closed-circuit television (CCTV) units nga gipamutang sa tibuok siyudad dili na moandar sukad pa niadtong 2017.
Kini nga pagbutyag misunod sa espesyal nga report ni Konsehal Roger Abaday nga nag-awhag sa mandatoryong pagbutang og mga CCTV system sa tanang barangay aron palig-onon ang pagpugong sa krimen ug mapalambo ang kaepektibo sa imbestigasyon sa kapolisan.
Sumala pa ni Rodriguez nga ang isyu sa mga dili na moandar nga CCTV sa siyudad gipatungha duha ka semana na ang milabay atol sa tigum sa komite sa public utilities, nga gipamunuan ni Konsehal Eric Salcedo.
Gihimo ang mga diskusyon uban sa kontraktor aron pag-ila sa mga solusyon aron mabalik ang sistema. Matud niya, ang matag CCTV unit adunay kaugalingong teknikal nga problema nga kinahanglang susihon tagsa-tagsa, ug sukad niadto, usa ka technical working group ang naporma aron sulbaron kini nga butang.
Gilaoman nga magtagbo pag-usab ang komite sa sunod semana aron ipresentar ang usa ka kompletong report ug mga rekomendasyon, lakip ang gibanabana nga gasto nga kinahanglang i-alokar sa lokal nga gobyerno matag unit alang sa pag-ayo ug pagpaandar og balik.
Nagpahayag usab siya og paglaom nga ang tanang 81 ka CCTV sa mga barangay mabalik sa operasyon, lakip na ang mga traffic light sa syudad, ug nanawagan usab alang sa dugang budget alang sa maintenance sa CCTV sa tuig 2027.
Photo courtesy: CCTVSG.net
