Nakaangkla sa tema “Bulig hu igka-uyag, Mabigel ha payananan” o “Tabang Panginabuhian, Kaugmaon Masaligan” ang duha ka adlaw nga 1st Saka Ta Malaybalay Livelihood Summit nga gipahigayon didto Kaamulan Open Theater, Kaamulan Park, Malaybalay City, Bukidnon Nobyembre 11-12, 2025
Anaa sa kalihokan si Governor Rogelio Neil P. Roque, City Mayor Atty. Jay Warren Pabillaran, ug uban pang lokal nga opisyales nga nagpakita sa ilang suporta sa mga partisipante ug sa kalampusan sa summit nga gipasiugdahan sa lokal nga panggamhanan aron matabangan ang mga residente sa Malaybalay sa pagpalambo sa ilang panginabuhi ug negosyo.
Gipunting ni Governor Roque nga kinahanglan mapataas ang buying power sa katawhan aron makasikad ug molahutay ang livelihood program initiatives sa nagkadaiyang stakeholders rason nga gitukod ang Bukidnon Coffee Roadmap aron ma-empower ang mga mag-uuma, sa ingon masuportahan ang gagmay’ng negosyo
Pinaagi sa Livelihood Summit Program, mas mapahanas ang mga gagmayng negosyante sa paghimo og dekalidad nga produkto gamit ang lokal nga materyales gikan sa kaumahan, ug mabaligya kini direkta sa mga konsumante.
Samtang gipadayag sab ni City Mayor Pabillaran nga paningkamotan sa gobyerno mapalambo pa ang livelihood program pinaagi sa edukasyon ug pagpakaylap sa kahibalo sa katawhan kabahin sa importansya sa pagpalit og lokal nga produkto nga makatabang dili lamang sa mga mag-uuma ug negosyante, kondili usab sa kalambuan sa ekonomiya sa syudad ug lalawigan.
Sa maong duha ka adlaw nga pograma, naglakip usab ang pagpahigayon sa Skills and Innovations Sessions sama sa hisgutanan sa Financial Literacy & Business Planning, Marketing Strategies, Basic Prototyping ug uban pa.
