Gisuspende sa Malacañang ang trabaho sa gobyerno ug klase sa tanang lebel, karong adlawa Nobyembre 10, 2025 tungod sa epekto sa Super typhoon Uwan, base sa gipagawas nga Memorandum Circular No. 106. Ang pagsuspenso gibase sa rekomendasyon sa National Disaster Risk Reduction Management Council (NDRRMC).
Base sa memorandum circular nga gipirmahan ni Executive Secretary Lucas Bersamin, ang walay klase naglakip sa National Capital Region, Cordillera Administrative Region (CAR), Regions 1,2,3, 4-A,4-B, 5, ug region 7.
Suspendido usab ang klase sa tanang lebel sa rehiyon 6 ug rehiyon sa Negros Island, sugod karong adlawa Nobyembre 10 hangtod Nobyembre 11, 2025. Gitataw sa Malacañang, nga magpadayon ang trabaho sa mga buhatan sa gobyerno nga responsable sa paghatag og mga batakang serbisyo.
Giklaro usab, nga ang mga local chief executives sa ilang tagsa-tagsa ka lugar mahimo usab nga modeklarar og suspension sa trabaho ug klase. Samtang ang pagsuspendi sa trabaho sa mga pribadong kompanya anaa sa direksyon sa ilang mga lider.
Sa laing bahin, nipagawas na usab og notice ang House of Representatives nga suspendido usab ang trabaho sa Kamara karong adlawa tungod sa Super Typhoon Uwan.
Photo Courtesy to:NDRRMC
