Gipahugtan karon sa National Disaster Risk Reduction and Management Council (NDRRMC) ang ilang pagpangandam alang sa bag-ong bagyo nga “Uwan”, nga gilauman nga musulod sa Philippine Area of Responsibility (PAR) sulod sa pipila ka adlaw.
Sumala ni NDRRMC Chairperson ug Department of National Defense Secretary Gilbert Teodoro, adunay lamang gamay nga “window time” hangtod karong Sabado sa dili pa moabot ang maong bagyo, busa gipaspasan sa ahensya ang tanang preparasyon.
Samtang, padayon usab ang Office of Civil Defense (OCD) sa pakigkoordinar sa mga lokal nga opisyal sa mga rehiyon aron mapalig-on ang kaandam ug kaluwasan sa mga residente, ilabina sa mga lugar nga delikado sa pagbaha ug landslide.
Gipahibalo usab sa Department of Social Welfare and Development (DSWD) ug sa Department of Health (DOH) nga naka-preposition na ang ilang mga suplay ug serbisyo sama sa pagkaon, tubig, medisina, ug uban pang relief goods nga ipanghatag sa mga maapektuhan sa bagyo.
Giplano usab sa mga ahensya ang maayong pag-manage sa mga sakyanan ug espasyo sa mga relief hub, aron masiguro nga husto ug epektibo ang paghatod sa tabang sa mga apektadong lugar.
Sa pagkakaron, wala pa matino ang eksaktong lokasyon sa pag-landfall sa bagyo “Uwan”, apan giandaman na kini sa NDRRMC, labi na ang posibilidad sa kusog nga pag-ulan ug pagbaha nga gilauman sugod karong Sabado.
Gikatakda usab nga magpatawag og briefing si President Ferdinand “Bongbong” Marcos Jr. sa buhatan sa OCD, aron personal nga masuta ang kahimtang sa preparasyon ug koordinasyon sa tanang ahensya nga nalambigit sa disaster response.
Gipahimangnoan usab sa NDRRMC ang publiko nga magmatngon, mag-monitor sa mga weather advisory sa PAGASA, ug mag-andam sa emerhensiyang kinahanglanon, aron malikayan ang kadaot ug kalit nga peligro inig-abot sa bagyo.
Photo courtesy: Philippines Watch Digital
