Nagpahibalo ang Department of Agriculture (DA)– Caraga nga andam na kini sa paghatag og PHP10.1 milyon nga kantidad sa mga binhi ug farm inputs alang sa mga mag-uuma nga naapektuhan sa Bagyong Tino.
Sumala sa report sa DA-13 Information Office, ang mga suplay sama sa binhi sa humay, mais, ug utanon, lakip na ang abono ug pesticide, nakapundo na sa ilang pasilidad. Alang sa mga mag-uuma sa humayan, andam na ipanghatag ang 520 ka sako sa hybrid rice seeds nga nagkantidad og PHP2.6 milyon, ug 1,907 ka sako sa certified rice seeds nga PHP1.68 milyon ang kantidad, inubanan pa sa lain-laing pesticide.
Sa bahin sa mga mag-uuma sa mais, adunay 100 ka sako sa hybrid corn seeds nga PHP600,000 ang kantidad, 50 ka sako sa abono nga PHP100,000, ug mga rodenticide nga andam usab ipanghatag.
Samtang alang sa mga high-value crops farmers, 34,000 ka pouch sa assorted vegetable seeds nga nagkantidad og PHP1.26 milyon ang giandam sa ahensya.
Gipasabot sa DA-13 nga naghulat pa sila sa official damage assessment gikan sa mga lokal nga pangagamhanan (LGUs) aron masiguro nga matarong ug patas ang pag-apod sa ayuda ngadto sa mga apektadong magsasaka sa rehiyon.
Ang maong inisyatibo kabahin sa padayon nga rehabilitation ug recovery program sa Department of Agriculture, aron masiguro nga makabawi dayon ang sektor sa agrikultura human sa kalamidad.
Photo courtesy: DA-CARAGA
