Nagpahimangno ang kapulisan sa rehiyon sa Caraga batok sa mga pulis nga aktibo sa pag-vlog o paghimo og content sa social media, human masuta nga posibleng makasuhan kini depende sa klase sa content nga ilang ipakita sa publiko.
Sumala ni Atty. Ramon Beleno, usa ka political expert, pwede nga mag atubang og kasong administratibo ang mga uniformed personnel nga nag-vlog, depende sa konteksto o sulod sa ilang video. Iyang gihisgutan ang insidente nga nahitabo sa Talisay City, Cebu, diin naghimo og “bring me challenge” content ang usa ka pulis nga nangayo og mga indibdwal nga adik sa droga baylo sa PHP2,000 isip parte sa iyang video nga nakaangkon og batikos sa katawhan.
Gidugang pa ni Belenio nga dapat magpabilin ang etika ug disiplina sa mga alagad sa balaod bisan pa sa ilang paggamit sa social media, aron malikayan ang mga aksyon nga makapaubos sa kredibilidad ug integridad sa kapulisan.
PHOTO COURTESY TO:LINKEDIN
