Nagpahigayon ang Department of Social Welfare and Development (DSWD)– Caraga og halapad nga distribusyon sa 37,836 ka family food packs (FFPs) alang sa mga pamilyang apektado sa Bagyong Tino sa rehiyon.
Sumala sa report sa DSWD-CARAGA, 20,752 ka food packs ang gipang-apod-apod sa Surigao del Norte, diin 13,900 niini ang gipanghatag sa Siargao Island, 4,182 sa Surigao City, ug 2,670 sa mga lungsod sa mainland.
Sa Dinagat Islands, 11,197 ka food packs ang gihatag sa unom ka lungsod: San Jose – 1,000 packs;Cagdianao – 4,995 packs; Dinagat – 942 packs; Tubajon – 846 packs; Libjo – 2,307 packs; Loreto – 1,107 packs.
Samtang sa Agusan del Norte, nakadawat ang mga lungsod sa Tubay ug Nasipit og 1,414 ka food packs, ug 1,561 ka food packs naman ang gipanghatag sa Butuan City.
Sa Surigao del Sur, duha ka lungsod ang nakadawat og 2,910 ka food packs, ug duha ka pack usab ang naabot sa Prosperidad, Agusan del Sur.
Matod sa ahensya, padayon ang koordinasyon sa DSWD-13 uban sa mga lokal nga pangagamhanan (LGUs) aron masiguro nga mahatod dayon ang tabang sa mga apektadong pamilya ug mamonitor ang kahimtang sa matag lugar nga naapektuhan sa bagyo.
Gipadayag usab sa DSWD nga magpadayon ang ilang relief operations hangtod nga mabalik sa normal ang kahimtang sa mga komunidad sa rehiyon.
PHOTO COURTESY TO: DSWDCARAGA
