Gipailalom na sa state of calamity ang tibuok lalawigan sa Cebu human kini nakaangkon og grabe nga kadaot sa paghapak sa Bagyong Tino.
Pinaagi sa Executive Order No. 68 nga gipagawas ni Governor Pamela Baricuatro niadtong Martes sa gabii, Nobyembre 5, gipahayag nga ang tanang lugar sa Cebu anaa na sa ilawom sa state of calamity aron mapaspasan ang paghatag og ayuda ug pagpanglimpyo sa mga apektadong dapit. Lakip sa mga lugar nga pinaka apektado sa bagyo mao ang Cebu City, Talisay City, Mandaue, Liloan, Danao, ug Compostela, diin daghang kabalayan ug estruktura ang nabaha ug nadaot.
Sumala ni Cebu City Mayor Nestor Archival Galos, 50 porsyento sa mga barangay sa lungsod ang nabaha, nga miapekto sa kapin 200,000 ka mga panimalay. Base sa report sa Office of Civil Defense (OCD) Region VII – Central Visayas, 82 na ang kumpirmadong namatay sa tibuok probinsya hangtod alas-5:30 sa hapon, Miyerkules, Nobyembre 5.
Apil sa mga biktima sa Cebu City ang upat ka miyembro sa usa ka pamilya nga natabunan sa landslide sa Barangay Sapangdaku, usa ka tuig nga bata nga naanod sa baha sa Pardo, ug walo ka miyembro sa usa ka pamilya nga gi-anod sa baha sa Barangay Bacayan. Samtang, lima pa ka miyembro sa ilang pamilya ang missing.
Padayon karon ang rescue ug retrieval operations sa mga otoridad, samtang ang Provincial Disaster Risk Reduction and Management Office (PDRRMO) nagpadayon sa pag-apod-apod sa relief goods ug medical assistance sa mga apektadong residente.
Gipasabot usab ni Gov. Baricuatro nga ang deklarasyon sa state of calamity magtugot sa paggamit sa calamity fund aron mapasayon ang pagpahiuli sa kuryente, tubig, ug imprastruktura nga naapektuhan sa bagyo.
Photo courtesy: INQUIRER.NET
