Nagpahimangno ang US Department of Transportation (DOT) nga posibleng isarado ang pipila ka parte sa airspace sa Estados Unidos kung magpadayon ang pag-absent sa trabaho sa mga air traffic controllers. Kini tungod sa padayon nga government shutdown nga miabot na sa kapin 40 ka adlaw, hinungdan nga daghang federal workers ang wala pa mabayri tungod sa kakulang sa pondo sa gobyerno.
Sumala ni US Transportation Secretary Sean Duffy, kung magpadayon ang sitwasyon, posibleng maapektuhan ang operasyon sa mga airline, nga magresulta sa daghang flight delays ug kanselasyon sa tibuok nasud.
Gipasabot sa opisyal nga nakadawat lamang og partial paychecks ang mga air traffic controllers sa unang semana sa shutdown ug sa miaging semana, apan wala gihapon makabaton og tibuok suweldo. Sama sa mga trabahante sa Transportation Security Administration (TSA), ang mga air traffic controllers giisip nga essential workers, busa kinahanglan nga magpadayon sa trabaho bisan pa adunay government shutdown.
Apan tungod sa taas nga kakulang sa bayad ug kapoy sa trabaho, daghang controllers ang nagliban o nag-leave aron makapangita og laing kapanguhaan sa ilang panginabuhi.Giingon sa DOT nga ang pagsirado sa airspace usa ka katapusang opsyon, apan gikinahanglan kini aron mapugngan ang kalit nga disgrasya ug masiguro ang kaluwasan sa mga pasahero ug crew sa kawanangan.
Sa pagkakaron, nagpabilin sa kritikal nga lebel ang manpower sa mga kontrol sa air traffic, samtang padayon ang koordinasyon sa White House ug Congress aron mahuman ang shutdown ug marestore ang normal nga operasyon sa transportasyon sa nasud.
Photo courtesy: FORBES
