Magpahigayon ug lawom nga imbestigasyon ang lokal nga panggamhanan sa lungsod sa San Fernando Bukidnon pinaagi sa Local Disaster Risk Reduction Management Office batok sa nahitabo nga pagsaka sa tubig sa Pulangui River gumikan sa mga aktibidades sa bag-ong natukod nga Hydro Power Plant sa barangay Sacramento Valley.
Gikumpirma ni LDRRMO Chief Romero Nabaja sa pakighinabi sa Juander Radyo Malaybalay ang pagtaas sa tubig sa gibuhatan sa hydro power dam gumikan sa pagsirado niini sa agianan kansang nakamugnag halapad nga kabalaka sa katawhan nga lumulupyo sa Malayanan ug Tugop sa maong lungsod human malapawan ug malunopan ilang mga kamaisan, kalubihan, manggahan ug uban pang mga pananum nga maoy ilang panginabuhian.
Dugang pa ni Nabaja nga adunay mga kasabutan nga gisupak ang maong Hydro Power Plant hinungdan nga nagkaproblema na sa pagkakaron ug usa na niini ang wala paghatag ug abiso sa katawhan nga nagpahigayon sila ug stoppage sa tubig.
Usa sa apektado nga mag-uuma sa maong dapit si BPAT President Dino Haba sa purok-4 Tugop kinsa miingong kantidad milyones ang damyos sa ilang mga pananum nga gusto nila pabayran sa maong contractor sa Hydro Power Plant.
Una niini, ang mga lumulupyo sa Barangay Malayanan nagpaabot sa ilang kabalaka kabahin sa kasamtangang kahimtang sa tulay nga maoy nang-unang agianan sa ilang lugar, diin hapit na kini malapawan sa tubig sa Pulangui sugod niaging ulahing semana bulan sa Oktubre 2025.
