Gipildi sa Oklahoma City Thunder ang Washington Wizards, alang sa ilang ika-unom nga kadaugan sa season, sa score nga 127-108.
Ang defending champion nahimong unang team karong season nga nakadaog og unom ka sunod-sunod nga duwa, human sa dominanteng kadaugan batok sa Washington.
Ang all-around point guard sa Thunder nga si Shai Gilgeous-Alexander, sa makausa pa nangulo sa team sa kadaugan, nga miiskor og 31 puntos ug pito ka assists. Gipasulod ni Shai ang tanang unom sa iyang unom ka free throws sa duwa.
Ang duha ka bench players nga sila si Ajay Mitchell ug Isaiah Joe mipakita sab og impresibong opensa nga miiskor og 20 puntos matag usa.
Sa dominanteng kadaugan, ang Thunder nag-una sa pagtapos sa matag quarter, bisan pa sa mga paningkamot sa Wizards nga maapsan ang 2025 NBA Champion.
Dako sab og bintaha ang Thunder sa 30 ka free throws nga gihatag sa mga referees alang sa team, diin si Alexander ang labing daghan ug nasulod.
Sa laing bahin, sa kapildihan sa Wizards, ang shooter nga si CJ McCollum nalimitahan lang ngadto sa 19 puntos, samtang si NBA champion Khris Middleton igo lang mihimo og unom ka puntos.
Photo Courtesy to:USA Today
