Bisan pa sa ka-busy sa selebrasyon sa Adlaw sa mga kalag, ang lokal nga gobyerno sa Malaybalay City nagpahigayon og Pre-Disaster Risk Assessment Emergency Meeting sa People’s Hall, City Hall Compound sa Casisang kagahapon Nobembre 2,2025 ala 1:00 sa hapon. Ang meeting nagtumong sa pag-andam sa siyudad alang sa posibleng epekto sa Bagyong Tino sa umaabot nga mga adlaw.
Ang meeting gipangulohan ni Mayor Jay Warren Pabillaran isip Chairman sa City Disaster Risk Reduction and Management Council (CDRRMC), uban sa mga representante gikan sa Department of the Interior and Local Government (DILG) Bukidnon
Sumala ni PAGASA Weather Specialist Yvone Pedraza, ang bagyo nakasulod na sa Philippine Area of Responsibility (PAR) ug mahimong makaapekto sa pipila ka bahin sa Northern Mindanao, lakip na ang Bukidnon. Ang Bagyong Tino gikataho nga adunay hangin nga moabot sa 110 kilometros matag oras, nga adunay pag-unos nga moabot sa 135 kilometros matag oras duol sa mata, nga naglihok paingon sa kasadpan-habagatan-kasadpan sa gikusgon nga 30 kilometros matag oras.
Samtang gipasalig ni City Disaster Risk Reduction and Management Office (CDRRMO) Chief Allan J. Comiso nga ang tanan nga gikinahanglan nga kagamitan ug mga rescue unit anaa sa standby kung mokusog ang epekto sa bagyo.
Gipasabot ni Mayor Pabillaran nga ang emergency meeting pinasubay sa mando sa DILG uban sa pag-awhag sa katawhan nga magpabiling mabinantayon ug magmonitor sa mga update gikan sa mga opisyal nga tinubdan samtang gibantayan ang Bagyong Tino.
via: CDRRM Council
