Gipahinumdoman sa Department of Health ang publiko nga mag-amping sa panahon sa Amihan ilabi na sa mga sakit nga sagad masinati karong panahona.
Nagdala ang Amihan og bugnaw ug uga nga hangin nga sagad masinati gikan sa Nobyembre hangtod Marso, busa importante nga andam ug protektado ang tanan.
Pipila sa mga sakit nga sagad mahimong problema sa panahon sa Amihan mao ang trangkaso, kon influenza; ang komon nga sip-on, nga sagad inubanan sa pag-ubo ug pagbahing; pneumonia, usa ka impeksyon sa baga nga mahimong hinungdan sa kalisud sa pagginhawa; allergic rhinitis, nga maoy hinungdan sa nose irritation ug pagbahing tungod sa allergens; ug uga nga panit, nga mahimo usab nga moresulta sa eczema, usa ka kondisyon diin ang panit mahimong katol ug mahubag.
Aron malikayan ang pagkuyanap sa maong mga sakit, ang DOH nipagawas og pipila ka importanteng pahinumdom ug rekomendasyon.
Naglakip kini sa paghugas kanunay sa imong mga kamot gamit ang sabon ug tubig, labi na sa dili pa mokaon ug pagkahuman sa banyo.
Kung nakasinati ka ug mga sintomas sa maong sakit, girekomenda nga magpabilin ka sa balay aron malikayan ang impeksyon sa uban.
Importante usab nga magsul-ob og face mask kung mogawas sa balay, ilabina sa mga dapit nga daghang tao, aron mapanalipdan ang kaugalingon ug ang uban.
Photo Courtesy to:Explained ph
