Ipailawom sa Philippine Coast Guard (PCG) ang tanang 770 ka operating units sa heightened alert status sugod Huwebes, Oktubre 30 hangtod sunod Martes, Nobyembre 4.
Kini taliwala sa gipaabot nga pagdagsa sa mga pasahero sa mga pantalan nga mamauli sa ilang tagsa-tagsa ka probinsiya subay sa pag-obserbar sa All Saints’ Day ug All Souls’ Day karong umaabot nga weekend. Ang ahensya gihingusgan ang pagbantay ug pagtabang sa mga pasahero sa mga pantalan.
Sa pakigtambayayong sa ubang ahensya sama sa Department of Transportation (DOTr), Philippine Ports Authority (PPA) ug Maritime Industry, ang PCG magtudlo usab og mga compassionate help desk sa tanang pantalan nga mahimong duolon sa mga pasahero. Maghatag usab sila og impormasyon sa pagbiyahe ug pagtubag sa emerhensya.
Andam usab ang PCG nga mopakatap sa ilang mga medical team aron motubag sa posibleng medikal nga kabalaka. Gawas niini, ipakatap usab sa mga barko ang K-9 units aron mohimo og baggage inspection.
Ang PCG magdestino usab og mga rescuers ug lifeguards sa mga beach ug island resorts nga sagad bisitahon sa mga bakasyunista karong holiday.
Photo Courtesy to:PNA
