Natapos na sa Senate Committee on Finance ang hearing sa proposed budget sa Department of Public Works and Highways (DPWH) ug isumite na kini alang sa paghisgot sa plenaryo sa pagbalik sa sesyon sa Nobyembre 10.
Sa wala pa matapos ang budget hearing, gisiguro ni DPWH Secretary Vince Dizon nga ilang ipasa karong Biyernes ang listahan sa mga unimplementable projects o mga proyekto nga dili na matuman, apil na ang mga na-terminate na infrastructure projects ug ang posibleng savings alang sa 2026.
Lakip sa ipresentar sa DPWH ngadto sa Senado ang revised Construction Materials Price Data (CMPD) human marekomendar ang pag-ayo sa presyo sa mga construction materials, ug ang updated project list sa matag distrito ubos sa National Expenditure Program (NEP).
Iapil usab sa dokumentong isumite ang mga proyekto nga adunay updated station numbers ug dugang nga validation ug justification alang sa mga proyekto nga usab-usab ang pondo.
Sumala ni Dizon, kung dili nila makompleto ang detalye sa mga gipangayo nga validation sa duplicated projects, ang Senado adunay gahum nga tangtangon ang maong mga proyekto sa 2026 National Budget.
Base sa report nga gisumite sa DPWH ngadto sa Senado bahin sa mga red-flagged projects, 798 sa 946 reappearing projects sa 2025 ug 2026 budgets ang validated na, samtang 4,085 sa 4,566 projects ang na-update na ang station numbers.
PHOTO COURTESY TO: SENATE
