Gihangyo ni Konsehal Marlo Tabac, kinse presidente sab sa Liga ng mga Barangay nga magpahigayon og citywide nga inspeksyon sa tanang mga building mapribado man o pampubliko, human nahitabo ang kusog nga linog kaniadtong Oktubre 10, 2025.
Gipaabot kini sa konsehal atol sa regular nga sesyon sa konseho kung asa iyahang gipasabot nga dili lamang mga tulunghaan ang angay nga i-inspeksyon apan tanang mga building sa syudad apil mga balay aron nga masuta ang mga kadaot nga gibilin sa linog.
Busa gihangyo ni Tabac ang tanang hingtungdang komitiba sa konseho ug departmento sa lokal nga panggamhanan nga ikonsidera kini nga sugyot aron na sab masiguro ang kaluwasan sa katawhan, mapakusog ang mga lakang diha sa disaster preparedness ug mapugngan pa ang posibleng mga kadaut sa umaabot nga mga kalamidad.
Giuyunan sab kini sa mga kaubanang konsehal ni Tabac, kung asa alang kang Konsehal Girlie Balaba nga angayan sab lantawon ang kahimtang sa mga malls ug hotels sa syudad. Samtang, si Konsehal Roger Abaday, misugyot nga lakip nga iinspeksyon ang mga istruktura nga nagapugong og pagbaha labi pa nga aduna nay mga natalang kaso sa pagkahugno sa mga flood control projects dinhi sa dakbayan sa Cagayan de Oro.
Photo courtesy: Cagayan de Oro City Council
