Nagpagula og pahimangno ang Bureau of Fisheries and Aquatic Resources (BFAR) ngadto sa publiko human makumpirmar nga positibo na sa Paralytic Shellfish Poison (PSP) o red tide toxin ang Lianga Bay sa Surigao del Sur, kini base sa pinaka bag-ong report sa laboratory test sa BFAR nga nagpakita nga misobra na sa regulatory limit ang lebel sa toxic red tide sa maong baybayon.
Pinaagi sa advisory, hingpit nga gidid-an ang pagkuha, pagpamaligya, pagpalit, pagkaon sa tanang matang sa shellfish ug alamang nga gikan sa: Lianga Bay, Surigao del Sur; Dumanquillas Bay, Zamboanga del Sur; Tantanang Bay, Zamboanga Sibugay; Coastal waters sa Zumarraga Island, Western Samar; Matarinao Bay, Eastern Samar.
Sumala sa BFAR, dili na luwas ang mga seafood nga gikan sa maong mga lugar kay posibleng mahilo kon makakaon ug kontaminado nga produkto. Gipasabot sa BFAR nga luwas pa ang pagkaon sa isda, pusit, uwang, ug kasag apan kinahanglan nga hugasan og tarong ug kuhaon ang internal organs sama sa hasang ug tina-i sa dili pa lutuon.
Giawhag sa BFAR ang mga konsumedor, mananagat ug negosyante nga magsunod sa mga pahimangno aron malikayan ang posibleng outbreak sa paralytic shellfish poisoning.
Sa pagkakaron, nagpadayon ang ahensya sa monitoring ug laboratory testing sa baybayon sa Surigao del Sur ug sa ubang mga apektadong lugar aron masuta ang tinuod nga kahimtang sa nasangpit nga toxin.
PHOTO COURTESY TO: ABS-CBN
