Gidasig sa Integrated Provincial Health Office (IPHO) Zamboanga del Sur nga pahimuslan sa katawhan ang mga naka-schedule nga mobile chest x-ray caravan nga gihimo sa matag Local Government Unit (LGU) aron mapugngan ang pagtakod o pagkatap sa sakit nga Tuberculosis (TB).
Sa interview sa media kang NURSE II Bernadette Amantillo provincial tuberculosis program Coordinator sa IPHO, gihangyo niini ang mga katawhan nga kon mahimo magpa TB screening test kada-tuig.
Dugang pa ni Amantillo, nga kun dili mahibal-an sa usa ka tawo nga adunay sakit nga (TB), dako ang posibilidad nga makatakod kini sa kauban dinha sa panimalay.
Niini, Giawhag ni Amantillo ang publiko nga dili kahadlokan ang sakit nga TB tungod kay kini curable o matambalan na sa pagkakaron.
Ang kinahanglan lang sa usa ka pasyente nga mo-cooperate ug moduol sa mga health center facility sa ilang lugar aron mahatagan og giya sa libreng pagtambal sa maong sakit.
