Gibutyag ni Environmental Management Bureau kon EMB X Regional Director Reynaldo Digamo nga ning undang na ang ilahang buhatan sa paghatag og budget sa mga Local Government Units kon LGUs sa nagkadaiyang proyekto.
Pananglitan sa dakbayan sa Cagayan de Oro, gihunong na sa EMB X ang paggahin og pondo aron sa pagtukod og mga Material Recovery Facilities kon MRFs tungod nasuta nga kadaghanan sa ilahang napatukod nga mga MRFs wala napuslan o naggamit man lang diha sa pag-atiman sa basura.
Saysay ni RD Digamo nga tuod dili lang kini nagahitabo sa syudad, apan sa tibuok nasud, kung asa ang ubang MRFs gihimong kulangan sa mga hayop, walay mga sulod, o napasagdan nalang ang pasilidad.
Samtang sukad sa iyahang paglingkod sa tuig 2019, naggahin silag financial ug technical assistance alang sa pagtukod og MRF sa disi sais ka mga barangay sa syudad kung asa 3 tulo niini ang wala na-implement tungod sab sa kakulang sa luna nga pagatukuran og MRF.
Kahibaluang sa kasamtangang problema karon sa basura, ginalantaw nga dakong tabang sa waste management ang pagtukod og mga MRFs aron nga pagadalhan sa mga recyclables ug uban pang basura nga pwede pang mapuslan ug aron nga dili mahan-ok tanan sa sanitary landfill.
Pamaagi sab kini aron nga maaghat unta ang katawhan nga seryosong mutamod sa istriktong pagpatuman sa segregation.
