Mokabat sa 23 na usab ka mga indibidwal ang nadakpan sa mga otoridad niadtong Oktubre 22 human sa bangis nga protesta sa gawas nga bahin sa asylum seeker hotel duol sa Dublin sa Ireland.
Sumala sa Garda o Irish state police nga ilang gidakop ang laing 23 ka mga indibidwal nga nagprotesta tungod sa paglabay niini ug mga tisa, botelya nga baso ug gipabuthan ang mga kapulisan, diin liboan ka mga indibidwal ang nagprotesta sa maong dapit.
Kahibaloan nga nasikop usab niadtong Martes ang unom ka mga indibidwal tungod sa susamang pag-atake sa mga pulis sa Ireland. Gani, gisunog sa mga suspek ang van sa kapulisan.
Ang mga protesta nahitabo human sa mga alegasyon sa usa ka 10-anyos nga batang babaye nga gi-atake sekswal sa usa ka 26-anyos nga lalaki. Apan, wala usab gikumpirma sa mga otoridad ang kabahin sa maong insidente.
Gikonda usab ni Justice, Home Affairs, and Migration Minister Jim O’Callaghan ang maong panghitabo ug gitawag kini nga “thhuggish violence”.
Photo courtesy to: BBC
